NEMC YAKUTANA NA KAMATI YA KUDUMU YA BUNGE YA BAJETI

Baraza la Taifa la Hifadhi na Usimamizi wa Mazingira (NEMC) limekutana na Kamati ya Kudumu ya Bunge ya Bajeti na kujadili utekelezaji wa bajeti kwa mwaka 2026/27 katika sekta ya Madini.

Katika wasilisho hilo, masuala ya udhibiti wa athari za kimazingira zitokanazo na shughuli za uchimbaji madini, usimamizi wa taka migodini, urejeshaji wa maeneo yaliyoathiriwa na uchimbaji pamoja na ufuatiliaji wa uzingatiaji wa Sheria na Kanuni za mazingira ni miongoni mwa maeneo muhimu yanayohitaji kupewa kipaumbele katika mipango na utekelezaji wa bajeti.

Kamati imeelekeza kuimarishwa kwa ushirikiano kati ya NEMC na wadau wa sekta ya Madini  katika kuhakikisha shughuli za uchimbaji zinafanyika kwa kuzingatia uhifadhi wa mazingira na misingi ya maendeleo endelevu.

Majadiliano hayo yanalenga kuimarisha usimamizi wa mazingira ili rasilimali za madini ziendelee kuchangia maendeleo ya taifa huku mazingira yakilindwa kwa manufaa ya kizazi cha sasa na kijacho.

NEMC YAKUTANA NA KAMATI MBILI ZA KUDUMU ZA BUNGE

📌Yawasilisha Masuala ya Usimamizi wa Taka ngumu na umuhimu wa kuanzisha Mamlaka ya Taifa ya Usimamizi wa Mazingira

Baraza la Taifa la Hifadhi na Usimamizi wa Mazingira (NEMC)  tarehe 21 Oktoba, 2026 Bungeni Dodoma, limekutana na Kamati mbili za Kudumu za Bunge, ambazo ni Kamati ya Katiba na Sheria pamoja na Kamati ya Maji na Mazingira, na kuwasilisha masuala ya usimamizi wa taka ngumu, fursa za kiuchumi zinazotokana na taka na mapendekezo ya mabadiliko ya Sheria yatakayowezesha kuanzishwa kwa Mamlaka ya Taifa ya Usimamizi wa Mazingira (NEMA).

Wasilisho hilo limeeleza umuhimu wa kuimarisha usimamizi wa taka ngumu ili kulinda afya ya jamii na mazingira, huku taka zikitambuliwa kama rasilimali zinazoweza kuzalisha fursa za kiuchumi kupitia urejelezaji na uchakataji. Aidha, kuanzishwa kwa NEMA kunalenga kuimarisha uwezo wa kisheria wa kusimamia na kudhibiti masuala ya mazingira, pamoja na kurahisisha michakato ya biashara na uwekezaji bila kuathiri matakwa ya kisheria ya utunzaji wa mazingira.

Akizungumza baada ya kikao hicho, Mkurugenzi Mkuu wa NEMC Dkt. Immaculate Sware Semesi alisema mabadiliko ya Sheria yanayopendekezwa yanalenga kuiwezesha Taasisi kuwa Mamlaka kamili inayoendana na Dira ya Taifa ya Maendeleo 2050, kwa kuwezesha biashara na uwekezaji na kukuza uchumi endelevu na rafiki kwa mazingira. Alifafanua kuwa mabadiliko hayo yanahusisha kubadilika kwa jina kutoka NEMC kwenda NEMA na kuimarisha vipengele vya kisheria ili Taasisi iwe mwezeshaji badala ya kikwazo kwa wawekezaji, hususan katika kutimiza masharti na kupata vibali vinavyohitajika kwa mujibu wa sheria.

Kikao hicho, kilichohudhuriwa na Naibu Waziri Ofisi ya Makamu wa Rais (Muungano na Mazingira), Mhe. Reuben Kwagilwa, Wajumbe wa Kamati pamoja na Menejimenti ya NEMC, kikiongozwa na Mwenyekiti wa Kamati ya Kudumu ya Bunge ya Maji na Mazingira, Mhe. John Kiswaga (Mb), na kujadili mapendekezo ya kuboresha mfumo wa Usimamizi wa Mazingira nchini kwa kuzingatia afya ya jamii, uwekezaji na maendeleo endelevu.

WAZIRI MASAUNI AWATAKA WADAU KUTUMIA SOKO LA KABONI KUANZISHA MIRADI YENYE TIJA

Waziri wa Nchi Ofisi ya Makamu wa Rais (Muungano na Mazingira), Mhe. Mhandisi Hamad Yusuf Masauni amewataka wadau wa maendeleo nchini kutumia Soko la Kaboni kuanzisha miradi inayoweza kufadhilika, mifumo inayotabirika na uwekezaji unaopimika.

Waziri Masauni ameyasema hayo Oktoba 22, 2026 Hyatt Regency akifungua Jukwaa la Soko la Kaboni na Uwekezaji Tanzania lililokuwa na kaulimbiu isemayo "Siku Moja, Soko Moja, Maono ya Pamoja" lililokusanya wadau mbalimbali wa maendeleo kujadili mambo mbalimbali yahusuyo biashara ya Kaboni.

"Jukwaa hili lisiishie kuwa mahali pa kubadilishana mawazo, liwe mwanzo wa ushirikiano unaozaa miradi inayofadhilika, mifumo inayotabirika na uwekezaji unaopimika." Amesema Waziri Masauni.

Aidha, Waziri Masauni ameongeza kwa kusema kuwa kila mdau aliyefika kwenye Jukwaa hilo atoke na hatua mahsusi: mwekezaji  akiwa na mradi wa kuwasilisha, taasisi ya umma ikiwa na fursa ya kutathmini, taasisi ya fedha ikiwa na bidhaa ya kufadhili, na NCMC ikiwa na orodha ya ahadi za kufuatilia.

"Nitaomba NCMC iniletee taarifa ya matokeo ya Jukwaa hili ndani ya siku thelathini. Ni muhimu pia kuhakikisha kuwa mapato na manufaa yatokanayo na miradi yanaendana na Sheria, mikataba na masharti ya uidhinishaji, huku maslahi ya Taifa na ya jamii yakilindwa." Amesisitiza Waziri Masauni.

NEMC imeshiriki Jukwaa hilo ikiwa ni Taasisi inayosimamia masuala ya Mazingira nchini ambapo Watumishi kadhaa wameshiriki wakiongozwa na Kaimu Mkurugenzi wa Tafiti za Mazingira, Dkt. Careen Kahangwa.

NEMC, TNBC NA TPSF ZAKUTANA KUJADILI NAMNA YA KUBORESHA HUDUMA ZA EIA KWA WAWEKEZAJI

Baraza la Taifa la Hifadhi na Usimamizi wa Mazingira (NEMC) limekutana na Kiongozi wa Tanzania National Business Council (TNBC) pamoja na Rais wa Tanzania Private Sector Foundation (TPSF) kujadili namna ya kutatua changamoto za masuala ya mchakato wa tathmini ya Athari kwa Mazingira na Jamii (EIA) na upatikanaji wa vyeti.

Katika mazungumzo hayo, viongozi hao waliwasilisha changamoto mbalimbali zinazowakabili wawekezaji nchini katika sekta ya Mazingira.

Aidha, Mkurugenzi Mkuu wa NEMC Dkt. Immaculate Sware Semesi ameelekeza watumishi wote kuhakikisha  masuala ya EIA yanashughulikiwa kwa wakati, wawekezaji wanahudumiwa kwa heshima na malalamiko yanapatiwa ufumbuzi, huku akiitaka Kurugenzi ya Tathmini ya Athari kwa Mazingira na Mameneja wa Kanda kusimamia kikamilifu utendaji wa watumishi walio chini yao.

Aidha, amesisitiza kuwa NEMC itaendelea kutekeleza jukumu lake la kulinda mazingira na kusimamia maendeleo endelevu kwa kuzingatia Sheria na Kanuni, bila kuwakwaza wawekezaji wanaofuata taratibu, huku ikihakikisha huduma zinatolewa kwa haki, uwazi na ufanisi.

KAMATI YA KUDUMU YA BUNGE YA MAJI NA MAZINGIRA YAKAGUA HALI YA MAZINGIRA DAMPO LA PUGU NA MTO NG’OMBE DAR ES SALAAM

Kamati ya Kudumu ya Bunge ya Maji na Mazingira leo, Oktoba 17, 2026, imefanya ziara ya kukagua hali ya mazingira katika Dampo la Pugu Kinyamwezi na Mto Ng’ombe, Dar es Salaam, kwa lengo la kutathmini utekelezaji wa maagizo yaliyotolewa na Makamu wa Rais wa Jamhuri ya Muungano wa Tanzania, Mhe. Deogratius Ndejembi, Septemba 18, 2026, kuhusu hatua za kukabiliana na changamoto za kimazingira katika maeneo hayo.

Akizungumza baada ya ziara hiyo, Makamu Mwenyekiti wa Kamati ya Kudumu ya Bunge ya Maji na Mazingira Mhe. Prof. Pius Zebhe Yanda (Mb) ameelekeza kuwepo kwa mpango madhubuti wa kudhibiti na kusimamia Dampo la Pugu na kusisitiza umuhimu wa kutathmini afya za wananchi wanaoishi karibu na eneo hilo ikiwa ni  pamoja na kuweka uzio ili kuhakikisha makazi ya Wananchi hayasogei karibu na dampo hilo

Kwa upande wake Naibu Waziri Ofisi ya Makamu wa Rais (Mazingira) Mhe. Reuben Kwagilwa ameeleza kuwa Serikali haina budi kuweka mwekezaji atakayeshughulikia uchakataji wa taka katika Dampo la Pugu, hatua inayotarajiwa kuboresha usimamizi wa taka na kupunguza athari za kimazingira kwa wananchi wanaozunguka eneo hilo.

Aidha, ameielekeza Halmashauri ya Jiji la Dar es Salaam kushirikiana kwa karibu na taasisi zote zinazohusika, ikiwemo Baraza la Taifa la Hifadhi na Usimamizi wa Mazingira (NEMC), ili kuhakikisha mradi wa dampo hilo haukwami.

Awali Mkuu wa Mkoa wa Dar es Salaam mhe. Albert Chalamila, akiwasilisha taarifa fupi kuhusu hali ya Mazingira amesema Mkoa wa Dar es Salaam una takribani kilomita za mraba 1300 na watu zaidi ya Milioni  tano na laki tatu kwa mujibu wa sensa ya Mwaka 2022 hali inayopelekea uzalishaji mkubwa wa taka kwa siku na kutokana miundombinu kupelekea kiwango kidogo cha taka kupelekea dampo.

NEMC NA IUCN ZAKUTANISHA WADAU KUJADILI MUSTAKABALI WA USIMAMIZI ENDELEVU WA BAHARI TANZANIA

Baraza la Taifa la Hifadhi na Usimamizi wa Mazingira (NEMC), kwa kushirikiana na Shirika la Kimataifa la Uhifadhi wa Mazingira (IUCN), limeandaa mkutano wa Tanzania Ocean Governance Forum, unaofanyika Oktoba 15–16, 2026, katika ukumbi wa Ramada Hotel, Dar es Salaam. Mkutano huo unawakutanisha wadau kutoka taasisi za serikali na zisizo za kiserikali kujadili Usimamizi endelevu wa bahari nchini Tanzania.

Mkutano huo unaongozwa na kaulimbiu isemayo “Towards Sustainable Governance in Tanzania: Strengthening Collaboration, Policy and Action”, inayosisitiza kuimarisha ushirikiano wa kitaasisi, kuboresha utekelezaji wa sera na kuchukua hatua madhubuti katika uhifadhi na matumizi endelevu ya rasilimali za bahari, sambamba na kukuza uchumi wa buluu.

Washiriki wa jukwaa hilo wanatoka katika taasisi mbalimbali, zikiwemo Ofisi ya Makamu wa Rais (VPO), Taasisi ya Utafiti wa Uvuvi Tanzania (TAFIRI), Taasisi ya Utafiti wa Uvuvi Zanzibar (ZAFIRI), MOBEF, Mamlaka ya Uvuvi wa Bahari Kuu (DSFA), ZEMA, pamoja na mashirika yasiyo ya kiserikali na wadau wengine wa mazingira ya baharini. Ushiriki wao unalenga kuimarisha uratibu na kubadilishana uzoefu katika usimamizi wa rasilimali za bahari.

Katika mkutano huo, mada kuu tatu zimejadiliwa, ambazo ni hali ya utekelezaji wa sera na mipango ya uchumi wa buluu, mipango ya matumizi ya maeneo ya bahari (Marine Spatial Planning – MSP) pamoja na uvuvi na uchumi wa buluu. Majadiliano hayo yanalenga kuimarisha utekelezaji wa sera, kuratibu matumizi ya maeneo ya bahari na kukuza sekta ya uvuvi kwa kuzingatia uhifadhi wa mifumo ikolojia na matumizi endelevu ya rasilimali.

Mgeni rasmi katika mkutano huo ni Naibu Katibu Mkuu wa Wizara ya Uchumi wa Buluu na Uvuvi Zanzibar, Bw. Zahor Kassim. Kupitia jukwaa hili, NEMC na IUCN zinalenga kuimarisha ushirikiano wa wadau, kubadilishana maarifa na kuwezesha maamuzi na hatua zinazozingatia sera na uhifadhi wa mazingira ya baharini, kwa manufaa ya kizazi cha sasa na kijacho.

#iucn#tafiri#zafiri#zema#mobef@dasfa@blueeconomy@oceangovernance