NEMC YASHIRIKI KONGAMANO LA BIASHARA NA UWEKEZAJI KATI YA UMOJA WA ULAYA NA TANZANIA

Baraza la Taifa la Usimamizi wa Mazingira (NEMC) lilishiriki katika Kongamano la Biashara na Uwekezaji kati ya Umoja wa Ulaya na Tanzania lililofanyika kuanzia tarehe 28 Septemba hadi 6 Oktoba 2026 nchini Finland, Italia, Uholanzi na Ubelgiji. Kongamano hilo liliwakutanisha wawakilishi wa Serikali, taasisi za umma, sekta binafsi na wafanyabiashara kujadili fursa za biashara na uwekezaji katika sekta mbalimbali, zikiwemo madini, kilimo, TEHAMA na bandari.

Miongoni mwa masuala yaliyojadiliwa ni uchumi mzunguko (Circular Economy), Mazingira, Jamii na Utawala Bora (ESG), pamoja na usimamizi wa taka zinazotokana na shughuli za uchimbaji na uchakataji wa madini muhimu (Critical Minerals), vifaa vya umeme na kielektroniki. NEMC ilishiriki katika mijadala ya jopo nchini Finland na Uholanzi kuhusu fursa za uwekezaji katika sekta ya madini muhimu na vipaumbele vya kimkakati vya Tanzania.

Katika mijadala hiyo, NEMC ilieleza umuhimu wa kuzingatia masuala ya ESG, matakwa ya kimazingira na ufuatiliaji wa mnyororo wa thamani wa madini. Ilisisitizwa kuwa uzingatiaji wa viwango hivyo unaweza kuimarisha ushindani wa Tanzania katika masoko ya kimataifa na kuongeza uaminifu wa wawekezaji.

Aidha, NEMC ilieleza kuwa usimamizi madhubuti wa mazingira na utekelezaji wa kanuni za ESG ni muhimu katika kuvutia uwekezaji endelevu, kuongeza thamani ya madini yanayozalishwa nchini na kupunguza athari za kimazingira zinazotokana na shughuli za uchimbaji na uchakataji.

Kwa ujumla, ushiriki wa NEMC katika kongamano hilo uliwezesha kubadilishana uzoefu na wadau wa kimataifa na kuwasilisha nafasi ya usimamizi wa mazingira katika kukuza uwekezaji endelevu. Pia, ulitoa fursa ya kuonesha namna uzingatiaji wa masuala ya mazingira, ESG na uchumi mzunguko unavyoweza kuchangia katika kuongeza thamani ya rasilimali za Tanzania na kuimarisha ushindani wake katika masoko ya kimataifa.

 

 

NEMC YATUMIA COP12 KUIMARISHA UHIFADHI WA MAZINGIRA NA FURSA ZA USHIRIKIANO

Baraza la Taifa la Hifadhi na Usimamizi wa Mazingira (NEMC) linashiriki kikamilifu katika Mkutano wa 12 wa Nchi Wanachama wa Mkataba wa Nairobi (COP12), unaofanyika tarehe 6 hadi 9 Oktoba 2026 katika Ukumbi wa Kimataifa wa Mikutano wa Julius Nyerere (JNICC), Dar es Salaam, Tanzania. Mkutano huo unaofanyika sambamba na maadhimisho ya miaka 40 ya Mkataba wa Nairobi umebeba kaulimbiu “Towards Sustainable Blue Economy in the Western Indian Ocean Region for People and Nature: A Journey of Forty Years.”

Ushiriki wa NEMC unaakisi jukumu lake la kisheria na kitaalamu katika usimamizi na uhifadhi wa mazingira, ikiwemo udhibiti wa uchafuzi, tathmini ya athari za kimazingira, uzingatiaji wa viwango vya mazingira na ulinzi wa mifumo ikolojia ya bahari na pwani. Kupitia COP12, NEMC inawakilisha masuala ya mazingira ya Tanzania katika majadiliano ya kikanda kuhusu uchafuzi wa bahari, mabadiliko ya tabianchi, uhifadhi wa bioanuai na matumizi endelevu ya rasilimali za bahari.

Aidha, NEMC inatumia jukwaa hilo kuimarisha ushirikiano na taasisi za kitaifa, kikanda na kimataifa kwa kubadilishana uzoefu, utaalamu na teknolojia katika usimamizi wa mazingira. Ushirikiano huo ni muhimu katika

Kwa NEMC, COP12 ni fursa muhimu ya kujenga na kuimarisha ushirikiano na taasisi mbalimbali za kitaifa na kimataifa, hususan katika utekelezaji wa majukumu ya uhifadhi na usimamizi wa mazingira.

 

NEMC YASHIRIKI MKUTANO WA FEDHA ZA TABIANCHI (CLIMATE FINANCE)

Baraza la Taifa la Hifadhi na Usimamizi wa Mazingira (NEMC) limeshiriki katika Mkutano wa majadiliano kuhusu Fedha za Tabianchi (Climate Finance Roundtable) uliofanyika tarehe 5 Oktoba 2026 katika Benki Kuu ya Tanzania (BoT), Dar es Salaam.

Mkutano huo umewakutanisha wadau kutoka Serikali, taasisi za fedha za kimataifa, washirika wa maendeleo, sekta ya fedha na sekta binafsi kujadili namna ya kuongeza upatikanaji na uhamasishaji wa fedha kwa ajili ya kukabiliana na athari za mabadiliko ya tabianchi na kuendeleza uchumi wenye ustahimilivu.

Majadiliano yamejikita pia katika kuimarisha mazingira wezeshi ya uwekezaji, kuandaa miradi ya tabianchi inayoweza kufadhiliwa, pamoja na kuongeza ushiriki wa sekta binafsi katika kugharamia hatua za kukabiliana na mabadiliko ya tabianchi.

Mkutano huu umefanyika katika wakati muafaka ambapo Tanzania na Jumuiya ya Kimataifa zinaendelea na maandalizi kuelekea Mkutano wa 31 wa Nchi Wanachama wa Mkataba wa Umoja wa Mataifa kuhusu Mabadiliko ya Tabianchi (COP31) utakaofanyika mwezi Novemba 2026 jijini Antalya, Türkiye. Hivyo, majadiliano haya yanatoa fursa muhimu ya kuimarisha vipaumbele vya Tanzania katika eneo la fedha za tabianchi na kuendeleza mikakati ya kuvutia rasilimali zaidi kwa ajili ya utekelezaji wa hatua za kukabiliana na mabadiliko ya tabianchi.

Ushiriki wa NEMC katika mkutano huo unaendeleza mchango wa Baraza katika utekelezaji wa sera na mikakati ya kitaifa ya mabadiliko ya tabianchi, uandaaji na usimamizi wa miradi ya tabianchi, pamoja na jitihada za kuongeza upatikanaji wa fedha za kimataifa kwa ajili ya utekelezaji wa hatua za kukabiliana na athari za mabadiliko ya tabianchi nchini.

 

 

NEMC KANDA YA BAGAMOYO YASHIRIKI UZINDUZI WA "BALOZI BATILDA ENVIRONMENT DAY"

NEMC Kanda ya Bagamoyo imeshiriki uzinduzi wa ' Balozi Batilda Environment Day' inayolenga kuhakikisha usafi wa mazingira unakuwa sehemu ya maisha ya kila siku, uzinduzi huo umefanyika Oktoba 3, 2026 huku ukimbatana na zoezi la usafi lililoongozwa na Mkuu wa Mkoa  Balozi Dkt Batilda Burian katika eneo la Tangamani Jiji la Tanga. Katika zoezi hili NEMC imetoa cheti cha pongezi kwa Ndugu Mohamed Ally Hilali kwa kutambua mchango wake katika utunzaji wa mazingira na Usafi Jiji la Tanga.

MASAUNI AITAKA NEMC KUDHIBITI UCHAFUZI WA MAZINGIRA NCHINI

Waziri wa Nchi, Ofisi ya Makamu wa Rais (Muungano na Mazingira), Mhe. Hamad Yusuf Masauni, ameliagiza Baraza la Taifa la Hifadhi na Usimamizi wa Mazingira (NEMC) kushirikiana kwa karibu na Halmashauri zote nchini kudhibiti uchafuzi wa mazingira na kutoa elimu kwa wananchi kuhusu usimamizi, udhibiti na urejelezaji wa taka pamoja na suala la usafi wa Mazingira.

Mhe. Masauni ametoa agizo hilo wakati wa ziara ya ukaguzi wa mazingira jijini Dar es Salaam, iliyolenga kufuatilia utekelezaji wa maelekezo ya Serikali kuhusu usafi wa mazingira, uhifadhi wa mito na mifereji pamoja na udhibiti wa taka. Awali aliongoza zoezi la usafi wa mazingira Soko la Kariakoo.

Mhe. Masauni amesema Serikali ipo kwenye mchakato wa kuifanyia marekebisho Sheria ya Mazingira ili kuipa nguvu zaidi na haitasita kuchukua hatua dhidi ya wanaokiuka taratibu za uhifadhi na utunzaji wa mazingira.

Kwaupande wake, Kaimu Meneja wa Kanda ya Ilala, Bi. Zainabu Kuhanwa, amesema NEMC inaendelea kushirikiana na Halmashauri zote nchini kuhakikisha usafi, uhifadhi na utunzaji wa mazingira unatekelezwa kwa ufanisi.

Aidha, Mhe. Masauni amewataka wananchi kuzingatia tahadhari na maelekezo ya Serikali kuhusu mvua za El Niño, ikiwemo kuepuka kutupa taka kwenye mito na mifereji ili kupunguza athari za mafuriko. Ziara hiyo ilihusisha Mnazi Mmoja, Mchafukoge, Mto Msimbazi, Kipawa, Karakata, Goba, Mto Ng’ombe Tandale, Mtaa wa Muhalitan na Daraja la Mkwajuni.

𝐍𝐄𝐌𝐂 𝐘𝐀𝐓𝐎𝐀 𝐌𝐀𝐀𝐆𝐈𝐙𝐎 𝐌𝐀𝐓𝐀𝐓𝐔 𝐊𝐖𝐀 𝐖𝐀𝐈𝐒𝐇𝐈𝐎 𝐌𝐀𝐁𝐎𝐍𝐃𝐄𝐍𝐈 𝐌𝐊𝐎𝐀 𝐖𝐀 𝐌𝐎𝐑𝐎𝐆𝐎𝐑𝐎

𝗡𝗶 𝗸𝘂𝗳𝘂𝗮𝘁𝗶𝗮 𝘁𝗮𝗵𝗮𝗱𝗵𝗮𝗿𝗶 𝘇𝗮 𝗺𝘃𝘂𝗮 𝘇𝗮 𝗘𝗹 𝗻𝗶ñ𝗼 𝘇𝗶𝗻𝗮𝘇𝗼𝘁𝗮𝗿𝗮𝗷𝗶𝘄𝗮 𝗸𝘂𝗻𝘆𝗲𝘀𝗵𝗮 𝗻𝗰𝗵𝗶𝗻𝗶

Baraza la Taifa la Hifadhi na Usimamizi wa Mazingira NEMC limetoa maagizo matatu kwa wananchi wa Mkoa wa Morogoro ikiwa ni pamoja na kuhama maeneo ya mabondeni, kusafisha mitaro, kuepuka ukataji miti kiholele sambamba na Utunzaji wa vyanzo vya maji ikiwa ni tahadhari za mvua za El niño zinazotarajiwa kunyesha nchini.

Wito huo umetokewa na Mkurugenzi wa Uzingatiaji na Utekelezaji wa Sheria (NEMC) Bw. Elibariki Bajuta wakati wa ziara ya kikazi ya siku mbili iliyofanyika tarehe 28 na 29 Septemba 2026 iliyoongozwa na Waziri wa nchi Ofisi ya Makamu wa Rais Muungano na Mazingira Mhe mhandisi Hamad Yusuf Masauni iliyolenga kukagua maeneo yenye hatari ya kukumbwa na mafuriko na hatua zilizochukuliwa kukabiliana na Mvua za El niño Mkoani humo.

Akizungumza na wananchi mara baada ya ziara hiyo, Mhe. Waziri Masauni amesema Serikali inaendelea kuweka mikakati thabiti ya kuhakikisha wananchi wanaishi katika Mazingira salama dhidi ya maafa huku akizitaka Taasisi ushirikishwaji wa Jamii wakati wa ujenzi wa miundombinu kama vile mifereji na makaravati ili kuepusha migogoro ya ardhi.

 

Aidha, Mkurugenzi Bajuta amesisitiza wananchi kudhibiti matumizi ya Mifuko ya plastiki ambayo inachangia Kwa kiasi kikubwa kuziba Kwa mitaro ya kupitisha maji.

Maeneo yaliyokaguliwa katika ziara hiyo ni pamoja na eneo la ujenzi wa tuta la Reli ya SGR katika eneo la Mkundi hadi Lukobe, Mto Diwale (Kata ya Kichangani - Turiani), Eneo la Dumila (Mto Kikundi), Mto Mkondoa- Kidete Kata ya Kasiki pamoja na mto Mto Lumemo- Halmashauri ya mji wa Ifakara huku ikishirikisha TRC,Bodi ya Maji ya Bonde, TARURA, TANROAD, pamoja na Halmashauri za Morogoro mjini, Kilosa, Mvomero na Ifakara.

ELIMU YA ZIMAMOTO NA UOKOAJI YATOLEWA KWA WATUMISHI WA NEMC

Baraza la Taifa la Usimamizi wa Mazingira (NEMC) limepokea elimu ya kinga na tahadhari ya Zimamoto na Uokoaji iliyotolewa na Jeshi la Zimamoto na Uokoaji chini ya Wizara ya Mambo ya Ndani ya Nchi, kupitia Afande Amani Hassan, Septemba 25, 2026 katika Ofisi za NEMC Mikocheni, jijini Dar es Salaam.

Elimu hiyo imelenga kuwawezesha watumishi wa NEMC na wananchi kutambua maeneo salama na kuchukua hatua stahiki za kujikinga dhidi ya majanga ya asili na yale yanayosababishwa na shughuli za binadamu.

Afande Amani amesisitiza umuhimu wa kuzingatia Sheria ya Zimamoto na Uokoaji ya mwaka 2007, pamoja na kuwa na vifaa muhimu vya kukabiliana na majanga ya moto, ikiwemo kizima moto na vifaa vya huduma ya kwanza

Aidha, amefundisha kwa vitendo namna ya kutumia vifaa vya kuzimia moto na kuchukua hatua sahihi kabla na baada ya kutokea kwa ajali za moto, pamoja na umuhimu wa kufahamu namba za dharura za Jeshi la Zimamoto na Uokoaji ambayo ni 114.

 Pia, Afande Amani ametoa tahadhari kuhusu mvua za El Niño zinazotarajiwa kunyesha, akiwataka watumishi na wananchi kuchukua tahadhari mapema, kufuatilia taarifa rasmi za hali ya hewa na kuzingatia maelekezo ya mamlaka husika kwa ajili ya usalama wao na mali zao.